Hollustubrownies – Já takk!

Hollustubrownies - Já takk!MMM

Var að hjóla einn morguninn hér í Rotterdam og fékk þá þessa skyndilegu og brjálæðislegu löngun í brownies sem er frekar sérstakt þar sem ég er frekar nýbúinn að uppgötva súkkulaðiheiminn.  Getur það verið að aldurinn sé að færast yfir konuna?  Veit ekki?  Allavegana óð mín beint í tölvuna – gúgglaði og gúgglaði og endaði á þessari – fann hana á www.mindbodygreen.com – þvílík snilld!

Innihald:

  • 1 bolli saxaðar döðlur (ef þú kemst í Medjool döðlur þá ertu í góðum málum)
  • ¾ bolli heitt vatn
  • ¾ bolli möndlumjöl
  • ½ bolli lífrænt kakóduft
  • ½ tsk. vínsteinslyftiduft
  • 3 msk hunang lífrænt
  • 2 tsk vanilla extract (vanilludropar)
  • Hnífsoddur af sjávarsalti

Aðferð:

  • Ofninn er hitaður í 180 gr.
  • Hellið heita vatninu yfir döðlurnar og látið standa í um 10 mínútur.
  • Hellið vatninu af döðlunum og geymið það þar til seinna í bakstrinum.
  • Döðlurnar settar í matvinnsluvél og nánast látið maukast. Getur þurft að stoppa nokkrum sinnum og ýta niður úr hliðunum með sleikju.
  • Möndlumjölinu, kakóduftinu, hunanginu, vanillunni og sjávarsaltinu er bætt útí.
  • Blandið vel saman.
  • Ef deigið er of þurrt þá þarf að nota vatnið sem notað var til að bleyta í döðlunum. Prófaðu þig áfram – betra að bæta við heldur en að hella öllu strax. Getur þurft að bæta við ef döðlurnar sem þú ert með eru þurrar.
  • Blöndunni hellt í kókosolíusmurt kökuform – ég notaði ferkantað 20×20. Brownies-ið var frekar í þynnri kantinum þar sem ég notaði ekki minna form en samt mjög gott.
  • Bakað í um 20-25 mín. Fylgstu vel með í lokinn – og notaðu endilega tannstönglaaðferðina – ef ekkert kemur þá er þetta tilbúið ásamt því að fylgjast með köntunum á kökunni – ef kantarnir eru farnir að fjarlægast kökuformið þá er þetta líklegast tilbúið. Þú vilt nefnilega heldur ekki baka þetta of mikið.
  • Leyft að kólna áður en þú skerð kökuna í sneiðar.
  • Að sjálfsögðu er alltaf jafn dásamlegt að drekka ískalda mjólk með og að þar sem ég átti heimagerða möndlumjólk þá varð úr þessi himneska tvenna.

Hægt að geyma í loftþéttu íláti í ískáp í allt að 5 daga – ef þetta verður þá ekki búið fyrr.

Á mínu heimili var þetta klárað á innan við þremur tímum. Því er það bara engin spurning að þetta verður endurtekið sem fyrst og þá jafnvel höfð tvöföld uppskrift.

Njótið!

Heilsukveðja frá Rotterdam – Hollandi,
Ásthildur Björns

Leave a Reply